Vanself vrolik
Tuine met lae onderhoudsbehoeftes is ‘n uitstekende plan op Orania, en as dit so vrolik kan lyk, soveel te beter. Hierdie sypaadjie van die Kemps is ‘n lekker voorsmakie vir die toeriste wat hierdie tyd van die jaar hier oorbly oppad na die groter wonder in Namakwaland.
Foto: Jaco Kleynhans
Belofte
Dis vir almal mooi, maar vir boere nog meer! Die lente was effe laat, maar waarskynlik baie goed vir veral amandels en sommige perske kultivars wat besonder vroeg blom. Daar is hoop vir ‘n goeie vrugset vir hierdie boere.
Lewende sprokie
Matriekafskeid en die tema is “sprokies”. Gabriel en Marilette gee kleur met hulle twee Nooitgedacht perde en ‘n perdekar waar leerlinge fotos kan neem, en watter mooi prentjie met die twee diere wat byna sprokiesagtig saamspeel met ‘n gesellige “gesinsfoto”!
Mosaiek
Orania Vaardigheidsfees ten bate van Nerina Projek* (Let op veranderde program)
Program:
Donderdag 29 September 2011
KAASMAAK Strek oor 3 dae 08:30 – 13:00 ( R300 p.p. ) beperk tot eerste 8 persone
MOSAïEK 08:30 – 10:30 ( R100 p.p. )
PAPIERMAAK 08:30 – 13:00 ( R100 p.p. ) beperk tot eerste 10 persone
HERWIN + GEBRUIK 14:00 – 17:00 ( R100 p.p. )
LASLAPPIES 14:00 – 17:00 ( R100 p.p. ) beperk tot eerste 10 persone
Vrydag 30 September 2011
KAASMAAK 08:30 – 13:00
BAKOOND BOU 08:00 – 17:00 ( R100 p.p. )
GESKENKPAKKE MAAK 08:30 – 13:00 ( R100 P.P. )
Saterdag 1 Oktober 2011
KAASMAAK 08:30 – 13:00
BOME OKKULEER 08:30 – 11:00 ( R100 p.p. )
MOSAïEK 11:00 – 13:00 ( R100 p.p. )
SJOKOLADE MAAK 08:30 –13:00 ( R100 p.p. ) beperk tot eerste 10 persone
BONSAI 08:30 – 11:30 ( R100 P.p. )
Besprekings by Orania Beweging tel. nr. 053 207 0062
Internet betalings: Absa Bank Rekening naam: Orania Beweging
takkode: 500902
Tjekrek. Nr. 2630143015
Verwysing: Van + Kursus faks na 053 207 0057
Telefoniese navrae: Stef Cilliers – loopfoon: 083 3000 912
*Nerina Projek samel fondse in om wooneenhede vir enkeldames te bou.
Orania gaan na die mense
Orania het die pas afgelope naweek uitgereik na ondersteuners toe ‘n sakebesoek gekombineer is met ‘n funksie op Secunda. Dit was die eerste lang-afstand rit met “Blommie” die bussie wat die Orania Beweging gebruik as amptelike voertuig, en daar is wel deeglik kennis geneem! Op die foto vlnr: Frans de Klerk, Jaco Kleynhans en Carel Boshoff.
Esna Schumann en dr Melodie de Jager
Volkskool Orania was bevoorreg om op Saterdag 13 Augustus die befaamde dr. Melodie de Jager as gasspreker te ontvang. Sy het gepraat oor “Hoe kan ek my kleuter help om skoolgereed te word?”
Dr De Jager is die skrywer van verskeie opvoedkundige boeke soos “Breingim” en “Babagim” en is ook die stigter van die “Mind Moves Institute”. Sy tree gereeld op televisie en radioprogramme as kenner van kinderontwikkeling op. Sy het al internasionaal naam gemaak en van haar boeke is reeds in ander tale vertaal.
Haar ontspanne styl en persoonlike aanslag het meegebring dat die gehoor tydens haar praatjie vasgenael gesit en luister het. Sy het talle praktiese wenke gegee oor kinderopvoeding en daarna aan Volkskool vier van haar boeke geskenk as naslaanwerke vir die skool se biblioteek.
Dr De Jager het ook Volkskool se aanvangsfaseklas besoek en was baie beïndruk met die werk wat daar gedoen word. Sy skryf in ‘n e-pos ná haar besoek: “Wat ‘n ongelooflike visie het julle nie vir jul kinders nie en hoe innoverend is die manier waarop jul die visie realiseer nie! By Volkskool Orania is kinders duidelik in omgee-hande.” Sy het die besoek so geniet dat sy belowe het om die skool in die nabye toekoms weer te besoek.
Baie geluk aan vyf van Orania CVO-skool se leerlinge wat deurgedring het na die BCVO se Kultuurfees gala-aand. Hillé du Plessis, Stefaan du Plessis, Aneleh du Plessis, Sibella Genis en Charlotte van Niekerk gaan eerskomende naweek in Pretoria optree en ons wens hulle alle sterkte toe. Ons is trots op julle!
Foto’s: Leerlinge in volgorde soos hierbo genoem. Hillé du Plessis het ‘n A+++ vir haar sang verwerf.
Fotos deur Magdaleen Kleynhans.
‘n Groep leerlinge van die Volkskool Orania het tydens die onlangse Eskom Wetenskap Ekspo in Kimberley bewys dat ouderdom nie ‘n voorvereiste vir sukses is nie. As die mees junior span wat aan die Ekspo deelgeneem het, het hulle met sewe medaljes huis toe gekom.
CJ Oosthuizen en Stephan van Biljon (graad 5) het ‘n sementsteen met ‘n koeldrankblikkie binne-in gemaak en daarna bewys dat die blikkiesteen ligter, goedkoper en meer klimaatsvriendelik as ‘n soliede steen is. Met hierdie oorspronklike projek het hulle ‘n brons medalje verwerf. Nolene Neethling en Benjamin Boshoff (graad 6) se projek waarin hulle sonkrag gebruik het om water in herwinde houers te verhit, het vir hulle ook ‘n brons medalje besorg. Wilhelm Schumann en Carel Boshoff (graad 5) het vuuraanstekers uit herwinde materiaal gemaak en getoets hoe dit vergelyk met gekoopte vuuraanstekers. Hulle het die beoordeelaars genoeg beïndruk met hierdie projek om daarmee ‘n silwer medalje los te slaan.
David Borman (graad 9) het met sy uitstekende navorsing oor aardbewings ‘n goue medalje verwerf. Die skudtafel wat ‘n aardbewing simuleer en wat David self ontwerp en gebou het, het veral baie aandag getrek.
Dit was die vierde jaar dat leerlinge van die Volkskool aan die Eskom Ekspo deelneem en elke jaar het hulle nog medaljes verwerf. Dit was egter die eerste keer dat so ‘n jong spannetjie deelgeneem het. Ná hulle goeie prestasies is hulle nou so entoesiasties dat hulle alreeds begin beplan het aan hulle projekte vir volgende jaar. Gemeet aan die sukses wat hulle hierdie jaar behaal het, wil dit voorkom asof daar ‘n blink toekoms vir hierdie jong wetenskaplikes voorlê.
Agter: Wilhelm Schumann (gr. 5), Carel Boshoff (gr. 5), David Bornman (gr. 9) en Shawn Bornman (gr. 7)
Voor: Benjamin Boshoff (gr.6), CJ Oosthuizen (gr. 5), Nolene Neethling (gr. 6) en Stephan van Biljon (gr. 5)
Fotos deur Eleanor Lombard.
Sing in Afrikaans!
Een van ons openbare vakansiedae (Taaldag) het hierdie jaar op ‘n Sondag geval, en die rol van Afrikaans in geestelike liedere is gevier. Kyk net hoe lekker sing die klompie leerlinge hier! Sop en toebroodjies kon daarna in Afrikaans geniet word!
Stelte
Die interessante alternatiewe wat oral gebruik word om behuising te verskaf is nuuswaardig, omdat dit die tekort aan behuising beklemtoon, maar ook die vindingrykheid van die mens wys! Op die foto hierbo word houtpale geplant vir ‘n houthuis-hier is al heelparty houthuise as vakansiehuise gebou, maar die gebruik word ook hier en daar in Orania self gesien.
Maak vol
Ons het ook enkele gegote betonhuise, maar hier word letterlik ‘n hele plan gegiet. Die totale muur-omtrek is in metaalvorms staan gemaak, en gaan laag vir laag gegiet word.
Solank die planne nie opraak nie!