Ons het onderstaande van die Voortrekkermonument ontvang: doen asseblief die moeite om die vraelys in te vul!
Geagte Vriende
Die direksies van die Voortrekkermonument en die Erfenisstigting is tans besig is met ‘n omvattende oudit rakende die toekoms van die Voortrekkermonument (VTM) en die Erfenisstigting (ES). Die ondersoek staan bekend as Projek Quo Vadis (2009) en die volgende sub-ondersoeke is reeds suksesvol afgehandel:
a. ‘n Regsoudit om die hele aangeleentheid vanuit ‘n regsooogpunt, met inagneming van alle relevante wetgewing, te bekyk.
b. ‘n Finansiële omsigtigheidsondersoek. (“due diligence”) van beide organisasies.
c. ‘n Ondersoek na alternatiewe en aanvullende bronne van inkomste.
d. ‘n Vakkundige ondersoek.
Die ondersoek is gedoen deur werkgroepe wat bestaan het uit verteenwoordigers van die vermelde direksies en ander eksterne kundiges, ten einde te verseker dat die uitsette daarvan as basis vir gesonde besluitneming sal kan dien. Alhoewel die uitsette reeds aan die ander werkgroepe ook beskikbaar gestel is, is dit nog nie verder versprei of andersins bespreek nie, aangesien daar eers gewag word totdat die volle ondersoek afgehandel is en die hele saak in konteks deur die direksies oorweeg kan word.
Die doel van die ondersoek is dan om te bepaal presies wat die opsies is wat vir die langertemyn (15-50 jr) vir die VTM en die Erfenisstigting oop is, gegewe bepaalde realitiete soos die veroudering van die infrastruktuur, onvoldoende staatssubsidiëring, herhalende kontantvloei-uitdagings, afnemende gemeenskapsbetrokkenheid by erfenisbewaring, die bedreiging van tasbare erfenisse en die toenemende behoefte vir VTM en Erfenisstigting-betrokkenheid elders in die land en internasionaal, ens.
Een van die opsies wat ondersoek word, is of dit enigsins sinvol, haalbaar en aanvaarbaar sou wees om aansoek te doen om die VTM en/of die Erfenisstigting as nasionaal verklaarde kulturele instellings te laat registreer. In die eenvoudigste moontlike terme is ‘n verklaarde kulturele instelling ‘n instansie wat in terme van die Wet op Kulturele Instellings en die Openbare Fondse Bestuurswet (“PFMA”) deur die Staat beheer en befonds word (soos bv die Oorlogsmuseum vir die Boererepublieke in Bloemfontein en die Voortrekker-/Msunduzi Museum in Pietermaritzburg). (Vir ‘n vollediger uiteensetting sien die Vraelys.)
Die vyfde werksgroep, nl die Emosionele Werkgroep, is tans besig met die uitstuur van vraelyste om die direksies van die VTM en die Erfenisstigting te kan adviseer oor die huidige klimaat sowel as mobiliseringsmoontlikhede wat onder ‘n diversiteit van Afrikaner- en Afrikaanssprekende belanghebbendes bestaan rakende die VTM en die Erfenisstigting. Met hierdie inligting sal belangrike strategiese opsies oorweeg kan word. Elke lid van hierdie subkomitee, asook die Bestuur van die VTM, het onderneem om te help met die verspreiding van die vraelys.
Met die oog daarop, word graag dringend versoek dat u die ingeslote vraelys aanlyn op die webwerf (URL) www.voortrekkermon.org.za/vraelys.php moet voltooi, van waar dit elektronies ingedien kan word. Die vraelys kan natuurlik ook afgelaai word en dan na voltooiïng, as aanhangsel, aan enige van die volgende adresse versend word:
a. Per hand voltooide vraelyste kan gepos word aan: Mev E Pretorius, Die Voortrekkermonument, Posbus 1514, Groenkloof, 0027;
b. Of gefaks word aan: Mev E Pretorius by 086 521 3831.
c. Per e-pos versend word aan mev E Pretorius by navorsing@voortrekkermon.org.za
Die bevindinge en aanbevelings van hierdie vyfde werkgroep kan op ‘n manier bepalend wees tov die toekomstige beheer en bestuur van die VTM en die Erfenisstigting. Dit word derhalwe vertrou dat soveel as moontlik ingevulde vraelyste terug ontvang sal word. Daarna sal die inligting gekontroleerd vasgelê en verwerk word teen nie later nie as 20 April 2010, met die oog op terugvoer by die onderskeie jaarvergaderings teen einde Julie 2010.
Die sameroeper van die Emosionele Werkgroep is Etienne Theart [thearte@iafrica.com] wat te enige tyd deur u gekontak kan word, indien nodig.
By voorbaat baie dankie vir u ondersteuning van hierdie projek! U is natuurlik welkom om hierdie vraelys te versend aan ander persone op u databasis maar hul voltooide vraelyste moet asb sonder enige redigering of konsolidering direk ingedien word, asb.
Vriendelike groete
Gert Opperman
Hoof Uitvoerende Beampte
Voortrekkermonument en Die Erfenisstigting
Tel : 012 326 6770
Faks: 086 615 9587
Sel: 083 300 4580
E-pos: hub@voortrekkermon.org.za
gerto12@telkomsa.net
www.voortrekkermon.org.za
