Hoe gemaak as almal vrolik Valentynsdag hou en ons dit nie netso wil na-aap nie? Dan hou mens ‘n tema-modeparade!

Een van die skole op Orania het die Tweede Vryheids-oorlog as hulle tema vir vanjaar gekies, en ‘n modeparade op Valentynsdag gereel om dit uit te beeld. Nie alle uitrustings was tema-getrou nie, maar die pret was outentiek!

Ons vra dikwels ondersteuning of gunste, maar vandag het ek iets om aan julle te skenk! Daar is naamlik ‘n hele klomp eksemplare van Boeremusiekboeke sonder buiteblaaie wat ons wil wegmaak, en gratis sal skenk aan enige persoon wat hulle self hier sal kom haal, of alle verpakkings- en posgelde self sal betaal. Let wel, hierdie boeke het nie ‘n buiteblad nie en mag gering beskadig wees. Die volle titel is: “Boeremusiek, tweede gedenk album” deur Piet Bester, en is uitgegee deur die Afrikaner Volkswag. Die boek is ‘n geskiedkundige oorsig van alle boere-musikante met interessante agtergronde of verhaaltjies oor elkeen en lees baie lekker! Daar is ongeveer 100 van hierdie gratis, buitebladlose voorbeelde beskikbaar, maar die Orania Beweging Boekwinkel het wel nuwe boeke MET buiteblaaie teen R80 elk plus posgeld en verpakking. Die pak- en poskoste is R50.

Skakel hieroor met Esme by 053 2070 057.

Hennie en Wanda Jonck

Pragtige pienk

Voortuin

Klipharde liefde

In ons jaarlikse tuinkompetisie het Hennie en Wanda Jonck die groot tuine afdeling verower, met Lottie Erasmus en die Groenewalds gesamentlik tweede. Floris en Rina de Meyer en Douw en Malie Ebersohn was gesamentlik tweede in die klein tuine afdeling. Let op die planne om onderhoud te beperk!

Esna Schumann bedank Jaco namens haar klas

Die CVO skool se graad 1 klassie

Soos gereeld die afgelope jare, het Solidariteit se Helpende Hand weer hierdie jaar skooltassies met vele interessante en nuttige geskenkies daarin uitgedeel aan duisende graad eentjies oor die land. By Orania se twee skole is hierdie fotos geneem.

Jaco Kleynhans en Lida Strydom word bedank!

Jaco Kleynhans van die Orania Beweging oorhandig 'n tassie

‘n Uitstalling genaamd “Elly Holm, vandag, today, heute” vind plaas vanaf 9 Februarie tot 22 Maart in die Ou Lettere Gebou van die UP, met die Universiteit wat medegasheer van die uitstalling is. Belangstellendes kan prof Dieter Holm kontak by 083 287 3220 of die Universiteit by 012 420 4017 vir besonderhede. Daar word ook tans deur die familie gewerk aan ‘n boek oor Elly Holm se lewe en kunswerke.

‘n Interessantheid wat na vore gekom het tydens navorsing:  Mev Holm het in 1960 ‘n voorstel aan Volkskas Bank gemaak vir ‘n logo wat bestaan het uit ‘n mannetjie wat sy moue oprol met die leuse “Skep jou eie toekoms, self”, op leiklip uitgekap. Hierdie kunsvorm was terloops uniek aan mev Holm, en sy het later letterlik wêreldwyd daarvoor bekend geraak. Ek weet nie of dit ‘n wedstryd was, of  ‘n tenderproses nie, maar die feit is dat Volkskas toe NIE hierdie logo van mev Holm gekies het nie, maar wel die ploegie wat later baie bekend geword het. Mev Holm het toe hierdie kunswerk aan prof Carel Boshoff se skoonvader geskenk, en daar het prof Boshoff dit gesien en dadelik die simboliek verstaan en aanvaar sodat dit heelwat later amptelik aanvaar is as Orania se simbool van selfwerksaamheid. Ons sal dit waardeer as enige persoon meer agtergrond kan verskaf oor hierdie voorlegging aan Volkskas.

In hierdie opsig bring ons dus ook hulde aan mev Holm en haar kuns, en is dit ons voorreg om ook gasheer te speel vir haar uitstalling tydens Orania se karnaval voordat die uitstalling na ander bestemmings in die RSA reis vir tydelike staanplek. Die Orania karnaval vind plaas op 30 en 31 Maart.

Gasvryheidsstudies behels ook praktiese sessies, en hierdie drie graad 6 studente (toevallig manlik!) het ‘n paar inwoners genooi om te kom proe aan hulle werk. Hulle kon ook inligting verskaf oor voedselgroepe, en dit het die ete maar minimaal beinvloed! Geen ernstige kritiek kon geopper word nie!

Ek glo Orania het seker nou die grootste aantal strooigeboue in die RSA! Hier word die fondasie gegiet vir mev Cornelia Holm se woning en ateljee van strooi.

Die CVO skool se kleuresport het toe presies gebeur soos beplan! Die fantasties-voorbereide baan (dankie aan Dorpsraad, ouers en personeel) het meegehelp om verskeie rekords te laat spat, en die meer as 300 atlete en 50 beamptes van 4 besoekende skole was dit eens dat dit ‘n goeie kombinasie van pret en ernstige atletiek was.

Orania se amandelboere het gesamentlik ongeveer 3 000 bome wat nou begin dra. Proewe word nou gedoen met meganiese oesmetodes, maar dusver met min sukses (die bome se bas word beskadig) en nog werk is nodig. Die oes word voorlopig dus per hand versamel terwyl nog masjiene gebou word. Dan moet ook gekyk word na meganisering van verwydering van skedes en doppe, gradering, verpakking en dies meer.

Komende naweek is daar weer groot skole atletiek in Orania. Die CVO skool se kleuresport vind Vrydag en Saterdag plaas, met 4 besoekende skole en ‘n totaal van ongeveer 300 atlete. Voorbereidings is volstoom aan die gang met skraap, rol, uitmeet en bane verf wat baie tyd verg. Dit is ook nou ‘n goeie tyd om erkenning te gee aan ouers, personeel en die Dorpsraad vir bystand. ‘n Omwoner wat die roller beskikbaar gemaak het op baie gunstige terme moet veral bedank word!